دبئی نے تاریخ رقم کردی، مریض تک ڈرون کے ذریعے ادویات پہنچادیں
دبئی کے ایک ہسپتال نے ایک مریض کے گھر دوائیں پہنچانے کے لیے ڈرون کا استعمال کرکے تاریخ رقم کردی۔ یہ کارنامہ فقیہ یونیورسٹی ہسپتال کی طرف سے انجام دیا گیا۔ اس اہم کارنامے میں دیکھا گیا کہ ایک ڈرون کو صحت کی دیکھ بھال کے مرکز سے دبئی سلیکون اویسس (ڈی ایس او) کے سیڈرے ولاز میں مریض کے گھر تک 10 کلومیٹر دور دوائیں پہنچانے کیلئے استعمال کیا گیا۔
فقیہ یونیورسٹی ہسپتال کے سی ای او ڈاکٹر فتح مہمت گل نے کہا کہ وہ مشرق وسطیٰ میں ڈرون کے ذریعے ادویات کی ترسیل متعارف کرانے والے پہلے شخص ہونے پر بہت فخر محسوس کرتے ہیں۔ انہوں نے کہا کہ ہم نے جدید خدمات فراہم کرنے کے لیے مسلسل تکنیکی ترقی کو اپنایا ہے۔ تاہم یہ اقدام صحت کی دیکھ بھال تک رسائی کو بڑھانے اور مکمل ڈیجیٹلائزیشن کو حاصل کرنے میں کافی آگے بڑھنے کی نشاندہی کرتا ہے۔
خلیج ٹائمز کے مطابق ڈرون کا استعمال کرتے ہوئے ہسپتال اب مریضوں کو فوری طور پر ادویات فراہم کر سکتا ہے، جس سے ردعمل کا وقت نمایاں طور پر کم ہو سکتا ہے اور ممکنہ طور پر نازک حالات میں جانیں بچائی جا سکتی ہیں۔
